قصص وحكايات من التراث الجزائري ومواضيع مختلفة تهم آدم وحواء

تابعوني على قناتي على اليوتيوب فضلا وليس امرا وهذا هو الرابط :    

https://www.youtube.com/channel/UCa0qNNnWmev4PyM6OeWE0Sg?view_as=subscriber

ــ الحكاية الأولى : ضحكة النساء على النساء (قصة المثل الشعبي الجزائري الي يقول ضحكة النساء على النساء،تاعك هاتيه نوكلوه في الغداء وتاعي خليه للعشاء)

                        

              نبداو القصة : بسم الله بديت وعلى النبي صليت،كان يا ما كان يا سادة يا كرام

كانت كاينة وحد القرية عايشين ناسها على الفلاحة يزرعو القمح والشعير ، وكانوا في القرية هذي جارتين متجاورين حذا بعضاهم وعلاقتهم طيبة ، في عام من الأعوام الأرض العام هذاك ما جابتش ، يعني كان المخصول قليل وكل زوج من هذوكم الجارتين حصد المحصول تاعو لي كان حوالي 10 قناطر وخبوه في المطمور، وكانت الجارة الاولى انسانة نية وطيبة اما الجارة الثانية كاني حيلية واستغلالية ، فكرت الجارة الحيلية وقالت : العام هذا المحصول قليل والشتاء تاعنا طويل ما عليا غير نروح ندبر راسي مع جارتي.

                                 

 

راحت الجارة الحيليةلجارتها النية طبطبت الباب حلت عليها وسلمت عليها وشافتها حالتها حزينة ، قالت الجارة الطيبة للحيلية: واشبيك يا جارتي تباني مهمومة ، جاوبتها : راجلي راح ونسيت ما قتلوش يخرجلي العولة من المطمور وما عنديش كيفاه نطيب الكسرة ، قاتليها جارتها الطيبة : ماعليش يا جارتي نعطيك من العولة تاعي

وعطاتها جارتها قربة قمح وقربة شعير ، فاتت الايام وكانت الجارة الحيلية كل اليوم تجي لجارتها الطيبة وتدي من عندها شويه قمح وشعير وهكذا حت النهار لي قريب تخلاص العولة تاع الجارة النية ، قعدت وحد النهار تخمم قالت ضرك نقصد جارتي ونطلبها واكيد ماهيش رح تردني خايبة ، متأكدة رح تعطيني شوية قمح وشعير ، وفعلا راحت الجارة الطيبة لجارتها الحيلية وقالتليها : يا جارتي جيت قاصداتك وعلابالي ما تخيبينيش جيت رح نطلب من عندك شويه قمح وشعير ، الجارة الحيلية قالتليها : اسمحيلي يا أختي ما نقدرش نعطيك ، كيما تعرفي الشتاء قرب وشتانا صعيب واولادي ياسر والعام طويل يا ربي لي عندي يكفيني ، الجارة الطيبة تصدمت مسكينة و ما صدقت واش قالت ليها جارتها وروحت لدارها تبكي وتقول هذي هي : ضحكة النساء على النساء ، هاي ضحكت عليا تاعي كلاتو في الغداء وتاعها استحفظت بيه.

وهذي هي قصتنا تاع اليوم نتمنى تستفيدو منها وتعلموها لأولادكم باش نحافظو على تراثنا ونقروه للأجيال الصاعدة ونفتخرو بيه

                                        والسلام عليكم ورحمة الله وبركاته.

تابعوني على قناتي في اليوتيوب : جزائرية فحلة   jazayiria fahla